14年前賣樓轉租狂燒270萬！地產經紀神剖析「有錢人先有資格租樓」掀世紀罵戰｜Juicy叮

「買樓定租樓」在香港堪稱人生的終極哲學題，一名地產經紀在Threads發文，分享了一個「14年前賣樓轉租」的真實悲歌，並拋出一個顛覆傳統認知的觀點：「唔係人工唔高先租，反而係搵到錢嗰批先有資格揀租！」 帖文一出即引爆網民熱議。14年交租270萬　換來「無根的自由」？樓主在帖文中透露，日前看到一名網民留言，指自己「14年前賣樓，呢14年交咗270萬租，而家仲要搬離住咗14年嘅地方，有啲唔捨得。層樓冇咗，租金仲要一路加。」這個血淋淋的例子，再次掀開了「租買之爭」的瘡疤。作為前線地產經紀，樓主打破了「買唔起先去租」的迷思，他指出：「先講租樓，唔係人工唔高先租，反而係搵到錢嗰批先有資格揀租。」他舉例身邊有做律師和獸醫的朋友，多年來堅持租住「四小龍」、「大四喜」或「愛海頌」等私人屋苑，每月兩萬多元的租金，「只係人工10-20%，仲有錢儲起，財務自由，得閒搬去邊都得，租係買自由。」相反，對於月入幾萬蚊的普普通通家庭，樓主苦口婆心勸喻：「千祈唔好40,000去租20,000樓，壓力太大。」他建議這類人應該先租萬多元的單位，儲幾年錢後買入200至400萬的上車盤自住，「升跌都唔使理，遇著大升就係你置富開端。」他更算了一條殘酷的時間帳：「因為租係一路加，供係一路減。第一年利息多過本金好肉赤，供到第9年後調轉，越供越多係自己。」文末更留下一句靈魂拷問：「租樓買自由，買樓買將來。你哋點揀？繼續租個自由，定係死供一層屬於自己嘅未來？」撐買派共鳴：5萬人工租2萬樓＝財務自殺這番「有錢人租樓、普通人買樓」的言論，獲得大批網民的強烈共鳴，有網民直指「窮人買樓，有錢人租樓，完」，認為「人工高果班真係可以周圍租；反而收入不高果班，簡簡單單靠買樓累積財富至係最簡單脫貧」。亦有基層家庭感性分享，指自己「啱啱買咗四小龍，唔想幫人供樓，終於有個安樂窩」。有網民更深入剖析香港中產與基層夾心階層的悲哀，直言租樓是「for比較富裕嘅人，買樓供樓比較適合大部份高不成低不就既香港人」。他計數指出，在香港租一個實用、符合家庭需要的單位約需月租2萬元，「你5萬人工租同財務自殺冇分別，你月薪150,000租，仲有好多理財嘅空間，前者係萬劫不復，後者係善用晒佢嘅自由度」。樓主對此亦深表認同，無奈表示見過不少月入3萬的租客，因為對住屋質素有要求，不願住五、六千元的唐樓，結果「租1房16,000至17,000，好難儲到錢，唯有逼住長租」。更有網民痛批當年賣樓交270萬租的事主「點解要咁蠢」，直言：「租樓話咩自由？咪係無根囉，業主加租你就要走，住咗14年有人情都無用，一樣要搬，嗰種無奈先係最慘......我哋普通人幾萬蚊人工，你唔買，個個月交2萬租俾人，30年後你有咩？得個吉。」另一名網民亦拋出金句警告打工仔：「一定唔可以冇資產底下直接租樓。當大家買樓，廿零歲，時間拉長30年退潮後就知道邊個冇褲着。」反對買樓網民精算大反擊：首期做定期加埋慳雜費 買樓冇優勢！不過，大批支持租樓的「精算派」網民隨即列出詳細數據反擊，有網民仔細計算機會成本：「租樓可留返首期嚿錢投資/做定期，百幾萬4-5%回報每個月已經5、6千；租樓唔洗比管理費，每月又慳2、3千；租樓唔洗比地租差餉，每月又慳2千，即係你而家比緊嘅租減差唔多1萬先可以同買樓比。」他強調還沒計算裝修、印花稅以及供樓高達7位數的總利息，「以前成日鼓吹買樓，係因為樓價會一百萬一百萬咁升......否則計晒所有數，就算計埋租會升，買都其實唔會話有好大優勢。」有網民亦嘲諷14年交270萬租的案例，直斥：「攞14年前買樓嗰筆錢投資，肯定呢14年賺嘅就唔止200幾萬啦！」惟這番「投資必勝論」隨即被其他網民潑冷水，反問：「最主要既問題係，舊首期有冇咁叻可以有穩定回報？有人當然賺大錢，但都有人可能total lost。」樓主亦幽了一默回應：「如果輸咗個首期，真係傷。」搬屋之苦 vs 換環境之樂　香港樓市何去何從？除了硬生生的數字較量，「生活質素」也是兩派爭拗的焦點，反對長租的網民大呻搬屋之苦：「搬一次屋已經沒了半條命，仲要兩年或四年一次？還未計揾地方，一日睇三四個盤真的很累人」，特別是「有養細路或者寵物，老人家喺屋企附近住唔想搬，有時間都去吓旅行，睇樓時間、換傢電時間，講就輕鬆」。但享受租樓的網民則認為「可搬係另一種自由。鄰居唔好，可完約搬；附近起樓嘈，又可搬。買難動身好多」，甚至覺得「搬順便執屋掉一堆垃圾，環境住悶左又可以轉一轉」。至於看淡長遠樓市的網民，則從人口結構入手，認為「而家香港愈來愈少年青人，所以樓前景就難看好」、「出生率越來越低，樓就不停起，傻既都識選」。不過樓主就以行內人視覺反駁，指出現時的市場結構已經改變：「而家啲樓都唔係俾本地人買，大量外資/國內人，將來你要租樓，就係同返佢哋租。」在帖文的最後，甚至有同行亂入留言「買樓記得搵我，半佣」，連樓主自己也忍不住自嘲：「我都希望我自住層樓快D供完，差唔多喇，仲差20年左右。」正如樓主在回應網民時所總結：「點解租同買長年累月爭拗咗咁多年，其實冇對錯的，自己揀咗最適合自己就可以。」來源：Threads延伸閱讀：現居公屋再花200萬買舊公屋！39歲港爸揭一原因上車 網民由嘲諷變體諒