Ray Online｜田北辰遊青海現高原反應 漏夜請司機送落西寧

田北辰遊青海現高原反應 田北辰卸任立法會議員之後，多咗時間歎世界。佢同太太去青海，雖然已經日日食定藥，但都係逃唔過高原反應，仲搞到要漏夜落返西寧呀！76歲嘅田北辰喺社交網站分享經歷，話旅程首日入住西寧酒店，海拔已經達2,000幾米，但並冇異樣。第二日去青海湖二郎劍景區嘅酒店入住，食晚飯嗰陣頭痛到就嚟爆裂咁。田北辰即刻量度血氧飽和度，發覺跌到百分之70幾。太太覺得呢個情況好唔對路，因為識老公幾十年都知佢極少頭痛，即刻漏夜請司機送返佢哋落西寧。 提醒大家小心高原反應吸咗成晚氧氣之後，田北辰朝早起身再量度，血氧飽和度已經升返去85%至90%，亦冇再頭痛。佢提醒大家如果年紀大，去高原一定要小心，多啲留意身體狀況。身體情況穩定之後，導遊帶田北辰同太太行西寧市中心。導遊分享西寧人其實好開心，最重要係住得舒服，1,000呎單位只係大約70萬人民幣，田北辰形容：「我哋香港人聽到流晒口水。」