宏福苑居民鬧爆政府拖延 幾時先至肯畀公眾知真相

就大埔宏福苑火災成立的獨立委員會今日(22日)提交報告。對於政府以宏福苑大火有關的涉案人士已被刑事起訴，為免影響審訊為由，會徵詢法律意見如何以適當方式盡快公開報告。有宏福苑居民鬧爆是拖延。 宏泰閣葉先生說：「一直以來政府畀公眾嘅感覺都係拖，對於我哋關心嘅問題，惜字如金。如果以部分進入司法程序而需要處理，無可厚非，但係連記招簡單交代都欠奉，咁就講唔通。一直等待嘅政治任命官員問責，道歉等等，依然略過。古小平(房屋局獨立審查組 高級屋宇保養測量師)被推出嚟受靶，喺聽證會時已經好明顯，佢作供嗰陣，乜都攬上身。所以一啲都唔意外。但係區區一個低級前線，又起到乜嘢問責作用？由最近一連串工程界醜聞，已經反映咗，決策由內到外，由上而下都爛透。宏福苑災難只有不斷延續。」 他批評獨立委員會今日向特首提交報告，但連一個簡單記招交代都無，他感到憤怒及失望。他說：「我哋等咗近一年，失去至親，等嘅係真相同問責。政府話要交律政司把關，我理解有刑事程序要處理，但連『已收到報告、會盡快檢視、預計幾時公開』呢啲基本資訊都唔願意講，係對家屬同公眾嘅唔尊重。我哋唔係要即日睇晒全文，而係要知道政府有幾認真對待呢份報告，同埋幾時先至肯畀公眾知真相。再拖落去，只會加深大家對『會唔會再被淡化』嘅疑慮。」 他續說：「連呢啲基本交代都唔講，只會令人覺得政府係想控制資訊、控制節奏，而唔係真心想盡快畀公眾知真相。我哋唔係要政治表演，而係要基本嘅透明同尊重。再繼續沉默，只會傷害已經受傷嘅人。」 對於政府今日發出的新聞稿，他直指政府表示收到獨立委員會報告、會研究、短期內改革追責、盡快公開。但這份新聞稿內容空泛，沒任何新意，不斷重複《施政報告》提及的內容，將兩者混為一談，好似將報告及《施政報告》綑綁一起，便當已經交代。 他說：「『短期內』三隻字，我哋聽咗成日，等咗近一年都係『短期內』。168人死咗，家屬同公眾等咗近一年，交報告當日連一個記招都唔開，只出一份寥寥幾隻字、冇新內容嘅新聞稿，呢個唔算交代，係冷漠同侮辱。我哋一直將憤怒壓抑，但依家已經去到極限。」 他續說：「政府可以話要處理刑事程序，但連預計幾時公開都唔肯講，繼續用『短期內』同施政報告嚟拖，係將死難者家屬當透明人。如果真係想問責，就唔好再講『短期內』，而係講清楚幾時公開、幾時追責。再繼續含糊同重複落去，只會令人更加質疑：政府係想還原真相，定係想控制節奏、淡化責任。我哋要求嘅係清晰時間表同實質回應，唔係再一次空泛嘅重複。問責制名存實亡久矣！」