柴灣男童衝出馬路險捱車撞 網民激讚司機「神反應」救一命

網上流傳一條男童衝出馬路險捱撞的車Cam影片，顯示日期在昨日（22日）下午3時51分，片中見一輛私家車沿柴灣新廈街往柴灣道方向行駛，當駛至近燈位前，當時燈號為綠燈，詎料一名男童突然從車頭左邊衝出馬路，幸司機「神反應」將車煞停，未有將男童撞倒。與男童同行的女子眼見驚險一刻嚇至尖叫，並舉手向司機致歉，隨後指罵男童「做咩嘢呀？紅燈嚟㗎！」。影片亦至此完結。 有網民睇片後均稱讚司機，「呢啲先係真正嘅反應快。要極留意路面情況先做到。目測估計係0.5秒之內，真功夫大師傅。」、「好反應！」、「好技術，救返(番)一條人命」、「師兄容許小弟比(畀)掌聲你」，但有心水清網民表示「會唔會係紅衫女子唔依燈過馬路，令個細路以為行得呢。」、「可能就係紅衫條X街亂過，先教到小朋友衝出去」、「小朋友唔懂事，過馬路一定要拖住小朋友」。