宏志閣續上樓執拾 居民控訴政府朝令夕改 業權方案細節不清不楚

大埔宏福苑宏志閣第二次上樓今日(14日)第二日，獲安排上樓的居民今晨8時許已陸續抵達現場，有居民繼續對政府購買業權等問題大控訴，對政府及業主立案法團管理人「合安管理有限公司」的安排極度不滿，同時對小市民無力反對感到無奈。直斥政府及合安朝令夕改，令他們無所適從，安排細節不清不楚，令他們無法作出決定。 對於業權問題，居住宏志閣中層的司徒太太表示，業權「之前又話買，然後合安前日又話有個簡介會，聽完好頭痛，三千萬你哋自己可以維修。」她認為不公平，指「我哋用咗啲錢去裝修，又冇問我哋意見，跟又拆晒個棚。」拆完後又要居民「畀錢裝修，裝修完之後點樣呢?唔知!」現在只能傾向見步行步，她稱政府和合安「每一日都唔同，每一日係唔同㗎，我哋決定唔到㗎。」 她稱，宏志閣本身樓宇無事，她上一次上過去看過，「咁你又拆咗我個棚，整體話要監察呀要睇，睇完之後，你同我講要畀番錢搭番個棚做番個維修?我哋覺得點解會咁樣嘅?先前又冇同我哋講，之後嘅埋單就我哋埋單，所以心情好難，你叫我點樣，我諗唔到。」維修後是否可以上去住，「又冇講，全部係你冇得出聲，資訊係畀你㗎咋，你冇得反映㗎，我去邊度反映?」 她指，「當我本身話賣(業權)嘅時候，諗咗好多嘢啦，配合佢啦，睇樓揀嘢啦，跟住前日又話唔係啦，你可以維修，咁即係叫我點?(苦笑)」她又稱，本身是想回去住，並哽咽地稱「因為住咗宏福苑咁耐，我喺度結婚生仔，係有感情，但你依家搞到咁樣，唔知真係唔知。」 對於政府購買業權方面，司徒太太稱，「你賣樓個啲，樓換樓個啲，概括大綱係有，但細節冇嘅，細節要問政府。例如上樓可以抽幾多次呢，揀樓都係抽，唔係樓換樓，抽得到當然好，抽唔到你點樣安置呢?」所以她「依家真係決定唔到賣唔賣，(方案)係唔夠吸引，之前話燒成咁，你希望配合政府賣，快啲上樓，大家真係好辛苦，但你一陣又話咁，一陣又話咁，我哋真係無所適從，唔知跟住賣啲樓幾多錢，依家概括知道啫，但我哋都未睇過，好多地區，例如五個地區，你叫我哋揀?點揀?無資料喎，點揀?」 對於業主大會，她指「好多居民要求開業主大會，宏福苑大維修開過好多次，我都有出席，但每次都嗌交收場，每次都好混亂咁樣，我哋居民好被動，你哋話要整咪要整囉。」但她目前亦希望開業主會，指合安開的介簡會只是「報告畀我哋聽，係冇得發文，喺ZOOM網上聽，我哋心中好多疑問問唔到。」 另一居於宏志閣8樓的孫先生表示，今次回家態度較上次認真，上次以為很快就能回家，但「呢次可能真係唔再返嚟」，因此連雪櫃、洗衣機等大型家電都一併帶走。孫先生形容今次上樓「攞得幾多就攞返」，主要拾回一些文件等重要物品，至於衣服、櫃子等次要物品因時間不足未能全部帶走。他慨嘆距離上一次上樓已相隔5個月，時間「當然相隔得耐」，曾想過會重返單位居住，期望可以再多一次上樓機會。 被問及會否出售業權，孫先生透露打算賣給政府，「點解？都唔知，個個都話賣咁咪賣咗佢」。對於有居民期望政府能補貼50萬港元購買新單位傢俬，他認為「有就當然好」，指「樓換樓」始終需要裝修及添置物品。孫又指，現時取回的物品根本無處擺放，只是有朋友表示想要。談及宏志閣維修費用可能涉及3,000萬港元，孫先生坦言「我都驚呀，畀咁多錢」，憂慮負擔沉重。