香港即時新聞網
走塑後DONKI三文魚改用密封包裝如「盲盒」 網民:逐盒同你揭開揀|網上熱話
來源 : AM730
更新 : 2024-04-23 17:51
網上有照片顯示,DON DON DONKI的刺身已由透明膠盒改為密封紙盒盛載。(網民「馮先森」@FB群組「香港突發事故報料區」) 即棄塑膠餐具及其他塑膠產品管制措施已經生效,首階段措施禁止銷售或供應膠餐具、膠碟等,但容許繼續使用和銷售未有成熟替代品的膠碗、膠盒等食物容器。有網民在連鎖超級市場DON DON DONKI發現,壽司和三文魚等刺身已經由以往的透明膠盒,改用密封的紙盒盛載,形容「失去咗先識得珍惜……完全睇唔到內籠。」相片引起網民熱議,有人戲言設計如同「盲盒」,「睇唔到點揀?全部比人揭過晒嚟睇又點買得落手?死得啦!」▼DONKI過往售賣壽司和刺身情況▼網民:睇唔到佢乾晒定新鮮啲網上流傳一張拍攝DON DON DONKI凍櫃的照片,可見櫃內擺滿用紙盒或紙碗盛載的日式食品,其中頂部設計由以往透明變成密封,再在外邊附帶紙條顯示盒內食品的圖片。有網民認為消費者難以再選購質素較好的刺身,「邊×個會買盒入面完全唔知係乜既(嘅)野(嘢)?盲盒咩」、「買嗰陣都睇唔到佢係乾晒定新鮮啲,真係玩嘢咩」、「睇唔到都唔知入面係乜,最撚慘如果有蟲都睇唔到,我仲敢搏。」亦有網民擔心食物品質,「隨時入邊啲壽司壞曬個盒都未凍」、「都唔俾人睇吓個樣點買啫」、「邊個話冇得揀 ? 師奶逐盒同你揭開嚟揀」、「睇到都唔×想食」。有人就留言獻計稱店舖可先用玻璃蓋展示,至結帳時才轉用紙盒,或先用保鮮花包裹直至被選購,「將啲蓋放埋一邊,顧客自己選購,自己蓋嗰蓋上去收都可以。」
已複製