政Whats噏：登報與袁弓夷脫離關係 容海恩現身拒回應提問

議員容海恩今日(5日)刊登聲明，稱與涉嫌違反《港區國安法》、其家翁袁弓夷脫離「爺媳關係」，消息猶如震撼彈。之不過，唔少人質疑聲明係咪有法律效力，又關注其老公袁彌昌與父親袁弓夷嘅關係何去何從。而容海恩今日傍晚出席活動時，對於相關提問都拒絕回應。 有法律界人士認為，由於聲明屬單方面個人表述，難言法律效力，相信佢係藉此同袁弓夷劃清界線，避免受其言論牽連。若果真係決意進行具法律效力嘅斷絕關係，需要涉事各方到法庭申請，經由法庭頒令。 另外，亦有網民發現容海恩曾申報，佢係獲認可嘅一般及家事調解員，希望佢盡快處理今次風波。至於向來活躍係社交平台嘅容海恩同袁彌昌，喺事件發生後未有再更新專頁。