敘福樓AI漫畫風年報惹議 黃傑龍否認「大公司慳返幾千蚊」唔請設計師

敘福樓集團主席及行政總裁黃傑龍因其公司最新年報用上AI漫畫風生成圖像風格惹爭議。(黃傑龍FB) 敘福樓集團主席及行政總裁黃傑龍因其公司最新年報用上AI漫畫生成圖像風格人物在牛角用餐的畫面，與最近流行的「吉卜力風格」AI 生成圖片類似，引來網民於社交平台facebook批評他「咁大間上市公司慳返幾千蚊唔請設計師好cheap！」、「咁大間公司唔重視版權！」、「唔俾機會本地設計師」、「用咗AI唔敢認」等。黃傑龍事隔數日發長文呼冤，強調「你唔需要同意我，但希望你唔好誤會我」，強調公司有四名全職平面設計師，年報封面製作過程有專業團隊參與，而非「大公司慳返幾千蚊」。 黃傑龍在社交平台發長文回應，直斥指控「真係冤枉」。他強調自己一向積極推動AI應用，其社交平台橫額、早前與藝人謝霆鋒的合照，乃至2022年的公司年報封面均為AI生成，他經常向同事提及：「AI暫時唔會淘汰你，但係識用AI嘅人好大機會淘汰唔識用AI嘅人，所以必須增值自己學用AI。」   澄清聘請四名全職平面設計師他澄清指公司共聘請四個全職平面設計師，用「正版Adobe」設計公司廣告等，並一直鼓勵設計師使用AI﹔今次年報封面設計是交予「專業周年年報公司」負責，更將雙方合約截圖作證，指對方聘用本地設計師，將他的心機及創意設計出每年的年報封面。他又提到，事實上周年年報公司給了三個封面讓其選擇，當中包括近期好紅的「手板玩具風」，但最終無選擇到是因為「太似玩具公司」。 「希望你唔好誤會我」至於為何利用AI設計年報，他直言年報封面「從來都係呢份報告最不被重視的」，因「上市公司年報係一份非常專業嘅法律文件，內容異常沉悶，我相信買咗幾十年股票嘅人都冇幾多個真係會睇嗰間公司嘅年報，通常都係睇吓新聞嘅啫，冇幾多個真係攞本年報嚟睇」，而自己卻是「嘗試重視呢個封面嘅人，因為我覺得無論幾沉悶嘅文件，目的都係要溝通，所以我每年都會花精神去諗個封面嘅主題。」，又指敘福樓年報一直暗藏「彩蛋」，「呢啲全部都係有心機，本來冇人要求我做嘅嘢，但係自己放心機落去。」 他強調希望令更多人明白「搞呢個封面嘅心路歷程，增加溝通係令到世界更加美好嘅好方法，你唔需要同意我，但希望你唔好誤會我。」  立即更新/下載AM730手機APP 體驗升級功能