政Whats噏：梁文廣開議辦 憶向港鐵爭取升降機

議員作為民意代表，除咗立法會綜合大樓嘅辦公室，亦會開設地區辦事處。九龍西直選議員梁文廣同選委會界議員陳凱欣，兩人喺美孚嘅「孖頭」議辦尋日(17日)開張。梁文廣話，美孚都可算係佢從政生涯其中一個重要節點，事關佢剛從事地區工作，其中一個協助做嘅請願倡議，就係爭取改善美孚港鐵站A出口嘅行人環境。 梁文廣憶述十多年前自己剛出道，美孚已經係一個入伙40多年嘅社區，人口漸呈老化，然而當時嘅港鐵站設施未能照顧長者需要，譬如出咗閘機之後，要喺隧道行一段長距離同埋要爬樓梯，先至抵達路面。而經過多年來嘅爭取，港鐵終於落實喺A出口增設升降機，但礙於要避開地面設施，工程已經進行咗兩年啦。雖然過程好漫長，但佢都相信升降機可以喺明年啟用。 由於美孚人口老化日益加劇，有關保健嘅需求十分戶殷切。梁文廣話美孚同其他基層社區相比，街坊嘅教育程度普遍較高，對科技嘅應用好快上手，好適宜推廣樂齡科技咁話。