香港即時新聞網
政Whats噏:大埔區會將討論「殺野豬令」 漁護署勢成箭靶
來源 : 東方
更新 : 2021-12-04 22:04
漁護署「即捕即殺」野豬行動惹起社會爭議,署長日前形容人道毀滅做法已經做咗平衡。有大埔區議員就話野豬喺香港「原居民」,只不過喺都市發展下,野豬嘅棲息地減少,增加咗同人類嘅接觸。有當區議員就話漁護署惹眾怒,打算喺下星期三(8日)召開嘅動物友善政策工作小組上提出動議,譴責署方主動撲殺野豬,並要求署方停止區內嘅撲殺計劃。
大埔區議員譚爾培同姚鈞豪,早前向大埔區動物友善政策工作小組主席何偉霖遞交動議,要求漁護署停止大埔區內嘅主動撲殺野豬計劃,並善用捕捉及避孕/搬遷計劃,同埋應該按《野生動物保護條例》擴大禁餵區,包括大埔鄉郊區,以取代近日實施嘅撲殺行動。
姚鈞豪指區內野豬滋擾問題唔算嚴重,佢都好少聽到市民投訴。對於漁護署藉口影響未來行動安排,而拒絕透露野豬滋擾黑點嘅詳細地址,姚就認為做法倒果為因,指署方有意隱瞞,甚至喺打算繼續喺黑點撲殺野豬。姚指如果署方若公開黑點,市民就唔會去餵。姚強調將喺會上要求漁護署交代各項隱藏嘅數據,包括區內黑點嘅詳細位置、理據同紀錄,要公眾有知情權。
另外,何偉霖都認同區內野豬滋擾問題並非嚴重,甚至有街坊見過野豬一家四口「出巡」,結果大家都相安無事,街坊都覺得佢哋好得意添。何強調動議唔喺比外界一個印象,以為大埔野豬滋擾問題好嚴重,而只喺防患於未然,阻止漁護署嘅行動。
何仲話漁護署自2017年開始推出捕捉及避孕及搬遷計劃,雖然只喺短短推行咗4年,但已漸見初步成效,唔明白署方點解突然改變態度,難以同公眾解釋。何建議食環署改良垃圾桶設計,減低野豬翻倒垃圾嘅機會,而政府亦可以加重餵飼野豬嘅罰則,毋須行至誘捕撲殺一途。何仲表示漁護署個講法係「無辦法唔殺」,但到底係咪真係咁?
而何都呼籲市民如果見到野豬,千祈唔好餵佢,亦唔好主動挑釁,留返空間畀大家各自生存好重要。雖然未知漁護署代表會唔會出席,但睇嚟都要好好準備答案向市民交代,否則喺會上分分鐘做箭靶。
根據漁護署回覆小組文件顯示,署方喺2017年起開始推行野豬捕捉及避孕/搬遷先導計劃,截至2021年10月,署方喺大埔區內共捕捉咗104頭野豬,其中63頭野豬進行咗避孕或絕育。另外,由2018至今,大埔區輋下村及井頭村共有3宗野豬傷人案,全部都喺野豬撞傷市民。
已複製
http://www.headline4hk.com/article/20211204/oncc/bkn-20211204214927489-1204_00822_001/
政Whats噏:大埔區會將討論「殺野豬令」 漁護署勢成箭靶
政Whats噏:大埔區會將討論「殺野豬令」 漁護署勢成箭靶